Recent Updates

保你大: 買大額保險要查身家?!

Feb 16, 2012 , Posted by Diamond Recruit at 2:00 PM

Dennis Lo
資深投資編輯及投資專欄作家,擅長分析及品評中資股,曾擔任《香港經濟日報》旗下《投資理財周刊》執行編輯。2006年10月出版第一本財經專書《讓你富起來》,2009年5月出版另一本財經書《逆市淘金》。羅現職投資理財顧問,並取得註冊財務策劃師資格(CFP)。

買大額保險要查身家?!


上次提到,龍哥介紹給我的前伙記阿成想買保險,保障自己的家人,但他很怕驗身,背後原因是怕拮針抽血!不過,以他的年紀和投保額,其實無需要驗身。


「森哥,買保險唔一定要驗身,真係幾好喎,因為唔係個個客都想驗身㗎!我相信,如果個個都要驗身,你哋一定做少咗生意。」阿成知道自己可以不用驗身後,心情也輕鬆起來,還跟我閒聊保險的問題。

「係呀,成哥,我哋都明白,年紀較輕嘅投保人,如果投保額唔大,其實風險唔會好高,所以,我哋只係要求投保人自己申報健康狀況,只要係冇任何病整,我哋都唔想麻煩到啲客。所以,我哋就做咗個表,按投保人嘅年紀,同埋投保額,去劃分佢哋到底使唔使驗身,如果要驗,又要驗啲咩!」聽到我這樣說,阿成突然嚴肅起來。

「咦,原來所謂驗身,唔係一律驗同一樣嘢嘅咩?」

「唔係㗎,如果你買5,000萬保險,我哋要求你驗嘅嘢係唔同你買1,000萬㗎!」

「吓,咁嘅咩?咁買5,000萬要驗啲咩嘢?」

「我舉個例,如果以你嘅年紀買1,000萬保險,我哋可能只需要你喺出面搵一個醫生或者檢驗中心做一次由醫生負責嘅驗身就得,做嘅都係基本嘢,例如量身高體重,抽血驗尿,量血壓,做心電圖等等;但係如果你買5,000萬,我哋可能要你由我哋指定嘅醫生做驗身,抽咗嘅血可能要驗好多功能,你可能都聽過,照心電圖可能唔係瞓喺度做,而係要跑住步做!」

「哦,我都好似聽過,大人話,如果你買得好大,保險公司可能要將你驗屍咁驗!」阿成誇張地說,連自己忍俊不禁。

「可能係㗎!講開買好大額嘅保險,我想提多句,其實,買保險除咗要身體健康先買到之外,亦唔係話你想買幾大就幾大㗎!我剛才舉例話你想買5,000萬保險,其實你都要出示一啲資產證明,證明你有咁上下身家,我哋先會俾你買㗎!」聽到我這樣說,阿成有點疑問。

「咦,森哥,咩你哋唔係大大都受嘅咩?」

「唔係㗎,成哥,因為我哋行內有種叫做道德風險。保險嘅原意係保障受益人萬一受保人遇到意外,無法再好似以前咁,為家庭提供生活所需。但如果一個人突然走咗,但屋企人嘅生活竟然仲會好咗,咁係咪好唔正常呢?」

「你嘅意思係?」

「直接咁講,如果我哋唔理投保人嘅財政狀況,只要佢身體狀況良好,佢想買幾大我哋都受佢,就會令佢有誘因去做『儍事』,特登買大啲保險,然後尋死博賠償囉!」

「哦,咁你哋有咩嘢要求呀?」阿成好奇地問。

「大致上係咁嘅,我哋同體檢一樣,都係有個指標,即係會根據受保人嘅年齡同埋收入,有個投保上限嘅指標,例如一個40歲,100萬年薪嘅投保人,佢最多可以買25倍年薪嘅保險。不過,呢個標準間間保險公司都可能唔同。我哋一般都係要求會投保人提供收入證明,或者資產證明,例如稅單,銀行存款,或者股票物業嘅資料囉,另外,我哋都要填好多資料㗎,主要都係交代客人買咁大保險嘅原因囉!」








讀者如有任何保險問題,歡迎來電郵詢問。
作者電郵:lkslo@yahoo.com

編按:作者現為友邦分區經理
Source : Money Times



聲明:
上述資料只應作為個人投資風險程度的分析及指引,不應作為 投資結論。
以上資料僅供參考之用,投資選擇過去的業績並不代表將來表現。
由於投資組合頗多元化,加上匯率及利率浮動,投資選擇單位 及收益回報可升亦可跌。






More on Financial Tips...

Currently have 0 comments:

Leave a Reply

Post a Comment