Recent Updates

保你大: 危疾多重保 要注意等候期

Sep 28, 2011 , Posted by Diamond Recruit at 3:09 PM

Dennis Lo
資深投資編輯及投資專欄作家,擅長分析及品評中資股,曾擔任《香港經濟日報》旗下《投資理財周刊》執行編輯。2006年10月出版第一本財經專書《讓你富起來》,2009年5月出版另一本財經書《逆市淘金》。羅現職投資理財顧問,並取得註冊財務策劃師資格(CFP)。

危疾多重保 要注意等候期


一方面由於醫學昌明,另方面基於重病年輕化,造就市場對多次賠償的危疾產品大受歡迎。茶餐廳老闆娘芳姐和她的姨甥仔阿東,對於這類產品就等別感興趣,還要我馬上講解何謂賠幾次。

「芳姐,阿東,如果係賠幾次嘅危疾產品,保險公司一般會將受保危疾分成幾個組別,最普遍係分成五個。唔使諗,癌症一定係其中最主要嘅一個,其餘就係同神經系統有關、同心臟有關、同主要器官有關以及其他唔屬於以上四類嘅嚴重疾病!」

「咦,咁都幾清晰喎!森哥,聽你咁講,癌症梗係最多人索償嘅一類危疾啦,因為佢可以自成一類。」阿東回應說。

「係呀,我以前都同芳姐講過,癌症幾乎佔我哋保險公司危疾賠償個案嘅一半,所以,間間保險公司喺保障癌症方面嘅次數都特別多 !」

「咁即係幾多次呀?」阿東心急地問。

「市場最普遍嘅係保三次,有啲就仲係保兩次!」

「咦,有一個問題,咁你哋保險公司係點計所謂保幾次呢樣嘢 ,我估冇理中咗一次癌症,啱啱醫番好又番發,你哋會照保啩?」芳姐果然精明,很快就能夠抓到重點。

「芳姐,妳真係醒。冇錯,我哋保險公司係有一套客觀標準去計算幾時會保第二次或者第三次嘅,呢樣嘢就叫做等候期嘞!」

「咦,咁即係話,等候期愈短,對客人嘅保障就愈大啦!」阿東對保險的慧根
似乎跟芳姐不相伯仲。

「冇錯呀,我哋保險公司都係以呢啲嘢去競爭 咋。嗱,癌症喺醫學上一般會以5年為治癒期,即係話,如果5年內唔番發,就當醫好咗。所以,如果受保人不幸患上第一次癌症,保險公司會先賠一次;當5年治癒期結束後,受保人不幸再患另一次癌症嘅話,保險公司會再賠第二次囉。」

「明白,但係你哋點計5年 ,係咪要醫番好第一次癌症後先計5年呀?」阿東馬上追問。

「好嘢,東哥,冇錯,大部分保險公司依家都係以醫番好第一次癌症後計算等候期嘅。不過,據我所知,近期亦有保險公司有啲突破,將計算等候期嘅方法,改為確診第一次癌症。你知啦,癌症呢樣嘢,好多時都會有一個較長嘅治療期,如果真係拖好耐先醫番好第一次癌症,咁到時先開始計5年咪好長囉。不過,要注意嘅係,如果係不同器官嘅癌症,就會以確診第一次癌症嗰日計5年,但係如果係同一器官番發,咁就會以清除第一次癌症嗰日計囉。」

「哦,明白,咦,但係其他病都係要等5年咩?」芳姐疑惑地問。

「問得好,唔係 ,我剛才咪話囉,保險公司會將受保危疾分成五個組別,除咗癌症之外,如果係唔同組別嘅重病,等候期只係一年 咋。」

「哦,咁都好合理!咦,但係我要搞清楚,你哋分咗類,咁即係除咗癌症之外,其餘危疾,如果同一類別就只可以賠一次?」芳姐又一次精明發問。

「妳講得啱,除咗癌症之外,而家每間保險公司嘅做法都係,每一個組別嘅受保疾病都係賠一次。所以,我想提一點,其實點分類都幾重要 ,但係,只要心臟病、癌病、腎病同中風分開咗屬四個組別,基本上保障都好夠 啦,因為呢啲都係香港人最易患嘅重病!」大家對我的解說似乎都頗滿意,但阿東好像有點憂慮,明顯欲言又止。







讀者如有任何保險問題,歡迎來電郵詢問。
作者電郵:lkslo@yahoo.com

編按:作者現為友邦分區經理
Source : Money Times



聲明:
上述資料只應作為個人投資風險程度的分析及指引,不應作為 投資結論。
以上資料僅供參考之用,投資選擇過去的業績並不代表將來表現。
由於投資組合頗多元化,加上匯率及利率浮動,投資選擇單位 及收益回報可升亦可跌。






More on Financial Tips...

Currently have 0 comments:

Leave a Reply

Post a Comment