Recent Updates

保你大: 第一份保險應該買甚麼?

Aug 15, 2011 , Posted by Diamond Recruit at 4:30 PM

Dennis Lo
資深投資編輯及投資專欄作家,擅長分析及品評中資股,曾擔任《香港經濟日報》旗下《投資理財周刊》執行編輯。2006年10月出版第一本財經專書《讓你富起來》,2009年5月出版另一本財經書《逆市淘金》。羅現職投資理財顧問,並取得註冊財務策劃師資格(CFP)。

第一份保險應該買甚麼?


經過我連番講解,芳姐和阿蘇終於幫我買了一份醫療保險。這天我約了他們解保單,但來到茶餐廰之後,看見芳姐和一位年青人在閒談,她看我便示意我過去,直覺上我估計,她是想介紹我認識那位年青人。


「森哥,你嚟得真係啱嘞,介紹我個姨甥仔你識,佢叫阿東,啱啱出嚟社會做事。佢聽到我約咗你簽收保單,佢都有興趣瞭解一下保險既嘢,尤其係佢哋咁後生,其實第一份保險應該買啲咩喎?」聽見有人有興趣瞭解保險,我是特別有興緅的,盡管最後不一定做得成生意。

「阿東吓嘛,好難得噃,你咁後生就明白保險既重要性,我相信你一定係好有計劃既人。」

「森哥,你過獎嘞,其實我係做貨運既,我知道每一單貨交付嗰陣,貨主都會同佢啲貨買保險,所以我特別明白保險係幾重要既嘢!我自己諗,貨物既價值始終有限,但我哋都會買保險,而人既價值咪仲高,我哋更加應該買保險啦!只不過,我唔係好知,以我哋年青人嚟講,其實應該買咩嘢保險比較適合
啫!」

「哦,原來你工作上都有接觸保險,咁就最好啦!嗱,咁樣講,同個人人身有直接關係既保險,主要都係4種既啫,包括人壽、意外、住院醫療同埋危疾。十幾廿年前,我哋啲前輩賣保險,梗係會叫人先買一份人壽,然後加啲意外,最多就係再加個住院醫療既rider(附加契約)!」

「係呀,實不相瞞吖,大約半年前,我啱啱出嚟做嘢嗰時,我爹哋個保險經紀同我講,佢都係叫我買番份人壽保險。佢話父母養到我咁大,依家終於可以出身,其實都應該買番份保險,表示一下孝心。但我總覺得,咁後生買人壽,好似冇咩用!」

「嗯,阿東,咁樣講啦,如果從孝順父母既角度,買一份人壽保險,受益人寫俾父母其實係無可厚非既!不過,如果從自己既角度,又或者配合今時今日既大環境,我就建議你買番份危疾嘞!」

「買危疾?你既意思係患咗癌症就有得賠嗰種?」

「係呀!睇嚟你真係幾熟噃!」
「唔好咁講,我都係知少少架咋!你再問我,我就口啞啞架喇!」

「以後生仔嚟講,你已經係好有知識同埋意識啦!」我略為說說笑,令到氣氛更輕鬆。


「唔好笑我啦!」

「好,言歸正傳!我記得,我係呢度同芳姐或者阿蘇都講過,買人壽其實最重要係睇你有幾多負擔或者責任!你哋可以諗到,一個後生仔,啱啱出嚟做事,樓又未買,拖又未拍,你話佢有咩嘢責任同負擔啫!所以,如果你問我,佢哋有排都未使買人壽!」

「喂,森哥,係咪咁講嘢呀,你聽唔到阿東爸爸個經紀講咩,其實買番啲人壽保障一下自己父母,又或者當係自己一啲心意,其實都幾好呀!」芳姐聽到我這樣說,似乎覺得我很不孝順,又或者會影響到阿東,所以馬上盡一個長輩的責任,糾正我的說法。

「芳姐,妳唔好咁緊張,我絕對同意妳既講法!只不過,我係從客觀理性既角度,分析保險既需要啫。今時今日,重病既發病率愈嚟愈年輕化,趁自己仲健康嗰陣,買定一啲危疾保險,我認為係最重要既嘢。仲有一樣係,你買人壽,受益既係屋企人;但危疾其實係生存保險,就係因為今時今日醫學昌明,就算不幸患咗重病,都仲可以有得醫,問題係你有冇錢,所以,我哋叫呢啲做生存保險!」

「生存保險?!」阿東和芳姐對於呢個名詞,既感到特別,又感到有趣!









讀者如有任何保險問題,歡迎來電郵詢問。
作者電郵:lkslo@yahoo.com

編按:作者現為友邦分區經理
Source : Money Times



聲明:
上述資料只應作為個人投資風險程度的分析及指引,不應作為 投資結論。
以上資料僅供參考之用,投資選擇過去的業績並不代表將來表現。
由於投資組合頗多元化,加上匯率及利率浮動,投資選擇單位 及收益回報可升亦可跌。






More on Financial Tips...

Currently have 0 comments:

Leave a Reply

Post a Comment