Recent Updates

保你大: 人壽方式的醫療保險諗得過?

Jul 18, 2011 , Posted by Diamond Recruit at 11:43 AM

Dennis Lo
資深投資編輯及投資專欄作家,擅長分析及品評中資股,曾擔任《香港經濟日報》旗下《投資理財周刊》執行編輯。2006年10月出版第一本財經專書《讓你富起來》,2009年5月出版另一本財經書《逆市淘金》。羅現職投資理財顧問,並取得註冊財務策劃師資格(CFP)。

人壽方式的醫療保險諗得過?


我一心以為,我花了個多小時,講解完各類型的醫療保險之後,芳姐和阿蘇很快就會幫襯我買一份醫療保險。誰知,兩日之後,芳姐主動打電話
給我,以有點揶揄的口吻對我說:

「喂,森哥,你都唔夠朋友喎!」

「吓,芳姐,何出此言呢?」

「上次你咪一口氣講解咗好多醫療保險既買法同賠償方法既,我仲以為市場上真係得嗰兩種,但原來仲有一種有儲蓄成分既醫療保險喎。我聽落都幾好,因為我俾出過既一分錢都唔會冇咗,而且,舉個例,我俾十蚊,保險公司就同我擴大到廿蚊,而且仲保到100歲,係咪有啲咁既事呀?」芳姐這樣跟我說,證明她對醫療保險很重視,而且,她真是個精明消費者!

「芳姐,冇錯呀,大約兩三年前,個別保險公司確實出過一啲儲備形式既醫療保險,買法就好似我哋買人壽一樣,俾咗保費就可以買到一個保障額,例如50萬或者100萬,視乎自己既投保額,而供款期大約20年或者到65歲等。只要妳投保之後,就等於即時有50萬或者100萬既醫療儲備。當你需要住院既時候,就按照計劃可以索償既項目獲得賠償。當賠咗之後,你既醫療儲備就會相應減少。」

「咦,咪係囉,咁樣幾好呀!係呢,如果我一路都冇claim,當我唔要張單嗰陣,我可唔可以攞番哂啲錢架?」

「可以既,但係都要等一個年期,大概要20年左右啦,過咗20年一般都可以攞番你俾過既錢,去到25年或者以上,甚至可以攞到妳俾過既錢既150%添,即係仲有利息添!」

「嘩,我覺得幾好喎。嗱,森哥,你話你係咪唔夠朋友吖,連呢啲咁好既嘢都唔通知聲!」芳姐帶點埋怨的口吻說。

「芳姐,妳要明白,一張刀係冇兩頭利既。呢類形式既醫療保險,有事有得賠,冇事又要俾番錢妳,邊有咁著數架!因此,呢類醫療保險,通常喺賠償方面會有限制既。例如其中一兩間保險公司會限制只賠住院手術同埋住院現金;有另一啲保險公司可以跟傳統既醫療保險咁按項目去索償,但佢就唔再分住房等級,基本上妳只可以當係住大房囉,而且又冇額外醫療賠償。既係話,萬一超出咗賠償限額,就要自己俾!」

「吓,咩原來賠償嗰陣咁多限制架?」


「係呀,仲有呀,所謂倍大咗你俾過既錢,妳唔好以為好多,一般都係一倍多啲,如果年紀大啲先買,仲低過一倍添!所以,我可以話妳知,呢類計劃推出咗都有幾年,但始終唔流行,就係因為比較貴,妳明啦,因為有儲蓄成分嘛,但最重要係佢賠償嗰陣有局限!而且,當妳年紀大,住多幾次醫院嗰陣,見到個pool愈嚟愈少,都咪話唔驚,所以,我先冇特別同妳提啫!」

「咁樣呀,不如妳幾樣嘢都俾啲資料我睇啦,等我再比較一下啦!」這個時候,阿蘇又拿著一份印有自願醫保既報紙過來,我知道,這兩張單又要等一段時間才可以做得成了!








讀者如有任何保險問題,歡迎來電郵詢問。
作者電郵:lkslo@yahoo.com

編按:作者現為友邦分區經理
Source : Money Times



聲明:
上述資料只應作為個人投資風險程度的分析及指引,不應作為 投資結論。
以上資料僅供參考之用,投資選擇過去的業績並不代表將來表現。
由於投資組合頗多元化,加上匯率及利率浮動,投資選擇單位 及收益回報可升亦可跌。






More on Financial Tips...

Currently have 0 comments:

Leave a Reply

Post a Comment